Christian Friedrich Ecklon (1795 - 1868) was 'n Suid-Afrikaanse plantkundige. Hy is op 17 Desember 1795 op Apenrade, Sleeswyk-Holstein gebore wat toe nog deel van Denemarke was. Hy studeer in Kiel in aptekerswese en begin belang stel in plante. Hy werk as 'n assistent vir 'n Kaapse apteker genaamd Polemann, wat 'n amateurbotanis was. Ecklon begin 'n groot versameling opbou en doen proefnemings in sy eie miniatuur botaniese tuin. Hy ontvang 'n klein jaargeld van die Koninkryk van Denemarke vir navorsingwerk wat hom in staat stel om sy ondersoeke na die binneland uit te brei. Hy het verskeie belangrike werke in oorleg met K.L.P. Zeyher gepubliseer, tog ondervind hy baie terugslae. Hy het ondermeer al sy besittings in 'n brand verloor. Hy is oorlede in Desember 1868.
Die standaard afkorting Eckl. word gebruik om hierdie persoon as die skrywer aan te dui wanneer 'n botaniese naam aangehaal word.