Raymond-Rogier Trencavel (ook Raimond, Oksitaans: Raimon Rogièr; 1185 – 10 November 1209) was 'n lid van die Trencavel adellike familie. Hy was burggraaf van Béziers en Albi (en dus 'n vasal van die Graaf van Toulouse), en burggraaf van Carcassonne en die Razès (en dus 'n vasal van die Graaf van Barcelona, wat op daardie stadium ook oor Aragon regeer het).
Raymond-Rogier was die seun van Rogier II Trencavel (d. 1194) en Azalais van Toulouse (wat ook bekend gestaan het as die "Gravin van Burlats"), dogter van Raymond V van Toulouse en suster van Raymond VI. Raymond-Rogier was getroud met Agnes van Montpellier. Sy tante, Beatrice van Béziers, was die tweede vrou van Raymond VI van Toulouse.
Raymond-Rogier het in die château comtal in die Cité de Carcassonne gewoon. Die château is deur sy voorvaders gebou in die 11de eeu. Raymond-Rogier was nie 'n Kathaar nie, alhoewel sy onderdane wel was. Hy het 'n laissez-faire houding teenoor Katharisme – en ten opsigte van ander kulture en gelowe – ingeneem. Hy het byvoorbeeld sterk op Jode gesteun om Béziers, sy tweede magsetel, te bestuur.
Teen die middel van 1209, aan die begin van die Albigensiese Kruistog, het ongeveer 10 000 kruisvaarders in Lyon bymekaar gekom en 'n opmars na die suide begin. In Junie het Raymond van Toulouse, wat die potensiële ramp wat voorhande was raakgesien het, belowe om teen die Kathare op te tree, en sy ekskommunikasie is gelig. Die kruistog het na Montpellier en die gebiede van Raymond-Rogier Trencavel opgeruk met die Kathaarse gemeenskappe om Albi en Carcassonne as hulle teiken. Soos Raymond VI van Toulouse, het Raymond-Rogier gestreef vir 'n onderhandelde skikking met die kruisgangers, maar Raymond-Rogier is 'n vergadering geweier en moes hom na Carcassonne teruggehaas om sy verdediging voor te berei. Die stad Béziers is in Julie geplunder en die bevolking uitgemoor.
Die stad Carcassonne was goed verstrek, maar was kwesbaar en oorbevolk met vlugtelinge. Die kruisvaarder, gelei deur 'n pouslike legaat, Arnaud Amaury, Abdis van Cîteaux, het buite die stad aangekom op 1 Augustus 1209. As vasal van Koning Pieter II van Aragon, Raymond-Rogier het gehoop op beskerming, maar Pieter was magteloos om Pous Innocentius III se leër en kon slegs as bemiddelaar opteer. Die beleg het nie lank geduur nie. Teen 7 Augustus het die kruisvaarders die stad se watertoevoer afgesny. Raymond-Rogier het 'n vrygeleide in die Kruistogkamp aanvaar om oorgawe voorwaardes te onderhandel. Aan die einde van die onderhandelinge is hy gevangene geneem en in sy eie kerker aangehou waar hy gesterf het, moontlik van disenterie, alhoewel daar ook vermoed is dat hy dalk vergiftig is. Die stad Carcassonne het op 15 Augustus oorgegee. Die inwoners is nie uitgemoor nie maar is gedwing om die stad te verlaat. Simon de Montfort is beheer van die gebied wat bestaan het uit Carcassonne, Albi, en Béziers toegeken. Raymond-Rogier se onteiende seun, Raymond II (1204-1263) het formeel sy regte aan Lodewyk IX van Frankryk opgesê in 1247, na verskeie pogings om sy erfenis te herwin.
Sommige outeurs identifiseer Raymond-Rogier met die legendariese Parsival.
Bronne wysig
- Graham-Leigh, Elaine. The Southern French Nobility and the Albigensian Crusade. Woodbridge: The Boydell Press, 2005. ISBN 1-84383-129-5.