Annelise Erasmus is 'n Suid-Afrikaanse vryskutskrywer en seksuele filosoof. Sy studeer vanaf 1986 aan die Universiteit van Pretoria, waar sy in 1988 'n B.A.-graad in Sielkunde en Kriminologie verwerf. Sy skryf drie boeke onder die naam Annelise, maar skryf ook verskeie artikels (akademies sowel as populêr) en verhale onder haar volle naam en van. Sy verwerf in 2013 'n B.A. Honneursgraad in Filosofie aan die Universiteit van Pretoria en in 2017 'n Meestersgraad by dieselfde universiteit. Die titel van haar verhandeling is "Masters, slaves and spiritual sexuality."
Lewe en werk wysig
Na sy haar eerste graad ontvang werk sy van 1990 tot 1996 as joernalis by die Suid-Afrikaanse Kommunikasiedienste op die redaksie van die Suid-Afrikaanse Jaarboek. Na die geboorte van haar kinders word sy 'n voltydse ma en tuisteskepper. Wanneer haar kinders ouer is begin sy weer skryf asook later weer studeer. Vir gesinsgeoriënteerde tydskrifte skryf sy verskeie natuurartikels. Sy skryf ook meningsrubrieke vir die By, 'n bylaag van die Beeld. Haar boeke gee sy self uit onder die handelsmerk Goddess-Unlimited Communications, terwyl sy ook die erotiese webwerf www.kombiekiehier.co.za skep. Sy is getroud met Gustav. Die egpaar het twee kinders (Andine en Zander) en bly in Pretoria-Oos.
Skryfwerk wysig
Op jong ouderdom verskyn haar eerste gediggie in Patrys, die maandblad vir die jeug. Sy debuteer met die erotiese roman “Maanvrug”. Die hoofkarakter is ʼn voorstedelike huisvrou wat worstel met haar seksualiteit en huwelik. Die opvolg hierop is “Weerloos”, waarin met genres en mites ʼn erotiese droom geskep word. Dakini was die priesteres van Inanna, die godin van liefde en seksualiteit. Die leser volg Dakini op ’n erotiese ontdekkingstog deur die Vroeëtyd en daarna. Daarna volg “Slavin”, waarin die tema van seksuele dissipline, pyn en masochisme (BDSM) blootgelê word, met mense wat genot daaruit put om pyn toe te dien en te ontvang. Tanika, ʼn enkelouer, feminis en skrywer doen navorsing oor BDSM en geleidelik word sy ingesleep om Meester Rudolf se seksslaaf te word.
Verbum et Ecclesia publiseer in 2017 haar artikel "When equal becomes the same. The spirituality of sex: Have we lost it?"
Publikasies wysig
- 2007 Maanvrug
- 2008 Weerloos
- 2010 Slavin
Ander Verwysings wysig
- Diedericks, Erla-Mari “Vir kop en lyf” “Rapport” 3 April 2011
- Eloff, Karin “Pynlike plesier” “By” 1 Mei 2010
- Ferreira, Louise “Klere wys nooit ja vir verkragting” “Beeld” 26 September 2011
- Fitzpatrick, Marida “Godin van begeerte” “By” 28 April 2007
- Rossouw, Johann “Méér as net ʼn soete, erotiese vrug” “Beeld” 5 Mei 2007
- Erasmus, A & Lombaard, C.J.S "When equal becomes the same. The spirituality of sex: Have we lost it?" Verbum et Ecclesia, Vol 38, No 2 (2017)
Verwysings wysig
- LinkedIn: https://za.linkedin.com/in/annelise-erasmus-80860855[dooie skakel]
- Boekemakranka: http://www.boekemakranka.co.za/Annelise.htm 9 April 2016 op Wayback Machine